Den Lauf der Zeit kon ma ned holt`n,

z´ruckdenga dean oft de olt`n

Roahauserer an de Bruck,

wo d`robn da Heilige Nepomuk

über`m Glanda mit zwoa Engl

oigschaut hot - und g`lacht a wengl.

Seit demma den do affe g`stellt,

hod ma a G`schichtln von eham erzählt.

Do hot a Schuasta-Moasta

do in Roahausn - no, wia hoaßta -,

mia follt`s ned ei - es macht a nixn,

an Lehabuam g`habt, an ganz an g`wixt`n.

Da Moasta war a bißl streng,

er sogt zum Lehabuam - gell Fritz,

wenn du d`Schuha fuat trogst und es follt wos ob,

a Trinkgeld, - gell, - des lieferst ob.

S`gschäft geht ned guat - du mächst dein Lohn,

d`rum muaßa da des vorher song.

Dem Fritz, dem hot des goa net passt,

aus Angst - er werd vom Moasta g`faßt,

hot er`s am Anfang a so g`macht,

und s`Trinkgeld sche zum Lehrherrn bracht.

Oamol griagt er - ganz überraschend,

a Fuchzgerl Trinkgeld - kaum zum faß`n.

Geht auße über d`olte Bruck

und hi zum Heiligen Nepomuk.

Bei dem erleichtert er sei G`wissn,

oll`s braucht da Moasta a ned wiss`n.

Des Fuchzgerl wer i bei dir hinterleg`n,

noch Feieromd - muaßt ma`s wieder geb`n.

So hot er mit dem Stoamo g`red

und s`Fuchzgerl drob`n bei eham vasteckt.

Da Schuasta - Moasta hod nix g`spannt,

weil`s meistens für koa Trinkgeld g`langt.

Noch Feieromd, do is da Fritz

zum Nepomuk hi, - wia da Blitz.

Langt affe, af den kolt`n Stoa,

d`aschrickt - des is ja doch net woar!

Des Fuchzgerl, des er griagt vom Kund`n,

war nimma do - es war verschwund`n.

Do schaut da Fritz den stoanan Mo

mißtrauisch von da Seit`n o,

- seifzt - und sogt dann mit am Grauserer

„Mei, Nepomuk, - bist holt a a Roahauserer!“

Do hot da Nepomuk scho g`schluckt,

doch dÈngln hab`n eham d`Händ fest druckt.

Es war holt g`müatlich no de Zeit

und net so bitterbös de Leit.

Vul Wasser is an Reng oi g`loffa,

im Kriag ham Bomb`m d`Rengbruck troffa.

- Er - is verschont blieb`n, - Gott sei Dank -!

Muatwillig hams dann - es war a Schand-,

Stickln von eham oba g`schlong,

oll`s hot er mit Geduld ertron`g.

Dabei hod g`wiß der Mo aus Stoa

koan Mensch`n no wos Unrecht´s doa.

Hätt er no g`wußt wos plant is woarn

dann war er sicherlich glei g`storb`n.

Wegreiß`n wolln`s de olte Bruck,

wos g`schiacht na mit`m Nepomuk?

Vorerst - um`s Schlimmste zu verhüt`n,

stellt man nei, in Dombauhütt`n.

Jetz moant er, hot s`letzt Stünderl g`schlong.

Wer wird denn do no noch mia frong?

Es is guat, das er net sicht,

wos in Roahausn olles g`schicht.

Sei Bruck ham`s total d`stampft und d`shaut

und neb`n dro a ganz neie baut.

Von da Kirch bis her ans Eck

reiß`ns ganze Heiser weg.

Kopfschüttelnd schaug`n d`Roahauserer zua.

Ma kon`s ehana ned verdenga,

dass jetza an den Heilig`n denga.

An Antrag stell`ns - da Nepomuk -

muaß wieder her an D`Neie Bruck.

Do kennt`s eich drah`n wiat`s wollt`s und wind`n,

ihr miaßt`s für eham a Platzl find`n.

Den Antrag hot ma respektiert,

an Nepomuk frisch afpoliert.

Er hot no gar net g`wußt wos wollt`n,

do dan`sn a no frisch vergold`n.

Wia Bruck und er dann fertig war, 

a Platzl g`schaffa, des is klar,

na ham`sn g`holt, samt seine Engl,

und feierlich g`stellt aufs Postamentl.

Von do ob`n verkünd`t er oll`n:

„Roahauserer, laßt`s eich ned oll`s g`foll`n!“